شقول ! شحجى ؟

Thursday, October 05, 2006

الاعلانات التلفزيونيه

فى رمضان تزيد الاعلانات التلفزيونيه كل من يبى يزيد مبيعاته على حساب استمتاعنا فى مشاهده مسلسلات لاتنتج الا لشهر رمضان (وانا اهنى ما اقصد مسلسلات فجر السعيد).
مده الاعلانات طويله فتلقى مسلسل مدته 20 دقيقه والاعلانات 30 دقيقه ومتوقعين انا ماراح نغير القناه لما تطلع الدعايات.
اللى يبط الجبد فى الموضوع هو النوعيه فاغلبها منتج لشركات سعوديه لان ربعنا حزره وماينقون على الاعلان التلفزيونى وايد وبالتالى تعال تحمل لهجه سعوديه بلسان لبنانى ،ولا مواضيع الاعلانات التى اعتقد ان اللى فكر فيها كان فى باله ان المشاهدين متخلفين وهذا حد عقلهم مثل دعايه غلاكسى اللى مجموعه حريم متيمعين على علبه كلوها كلها ولما بقت وحده قعدوا كل وحده تعزم على الثانيه ليه شاب راسهم وكبروا بالسن. شنو الحكمه من هالدعايه مادرى !ومن كثر مابطت جيدى بطلت اشترى غلاكسى.
من الدعايات المنتجه محليا فى دعايه لمحل اسمه
( 4U )
مبين ان اللى فكر فيها واخرجها واحد هاوى يمكن ولد صاحب المحل ولا ولد عمه لان مايبى يدفع فلوس لشركه اعلان. الدعايه من كثر تفاهتها ورداءه الممثلين فيها ذكرتنى بايام زمان اول ماشرينا كاميرا فيديو كنا نصور دعايات نسويها للضحك وتضييع الوقت. وحده من الدعايات كانت عن شامبو للشعر فتدخل وحده شعرها طويل وناعم وتركض (سلو موشن) وتلفح بشعرها يمين ويسار وبعدين توقف وتمسح على شعرها وترفع قرشه الشامبو وتقول : اشترو الشامبو الفلانى وايد زين شوفو شسوى بشعرى لحسه لحسه.
انا اعتقد ان دعايتنا البدائيه هذى احسن بوايد من الدعايات اللى ذابحينا فيها هالايام.

13 Comments:

  • At 10/06/2006 4:51 AM, Blogger Mamloo7a Q8ia said…

    حلوه والله سالفة لحسه لحسه؟؟؟؟
    فعلا الدعايات السخيفه بدون اي فكره او ابداع زايده ودائما في رمضان
    الحمدالله السنه ماني من متابعين التلفزيون لاني ماني ناقصه رفع ضغط

     
  • At 10/06/2006 11:09 AM, Blogger Warda said…

    there is no creativity anymore!!!

     
  • At 10/07/2006 1:23 PM, Blogger Unknown said…

    موضوعج وايد مهم
    و انا كاتبه بنفس الموضوع اليوم
    زوريني

     
  • At 10/09/2006 3:19 AM, Blogger Unknown said…

    اسخف اعلان اعلان حليمة
    لا واللى يغث اعلان بيتزا بيتزا بعد الفطور
    اووف احس ان فعلا ثقيل على المعدة

    موضوع يونس وفعلا مهم جدا

     
  • At 10/10/2006 1:59 PM, Blogger شقول! شحجي؟ said…

    مملوحه كويتيه ، ورده ، نيله ، مشارى
    مشكورين على الزياره وانشالله امركم.
    انا اقول ان الاعلانات وسيله تعكس طريقه تفكير المجتمع اللى انتجت فيه، وهذا حد تفكيرنا.

     
  • At 10/11/2006 4:23 AM, Blogger Unknown said…

    خل تكون مثل ما تكون

    بس الكثرة هي غاثتنا ومخليتنا ما نتابع شيء بهوس

    -----

    الله يخلي الشوتايم

     
  • At 10/14/2006 10:03 PM, Blogger ام الحفيز said…

    شقول شحجي...لامويمتي وشقووول

    كل بصوووب ودعاية انا حلوه انا طعمه وانا سمبا يعلها تغص بهمبه...مادري الدعايه للعطر ولا لها خلووووووه تخليها اسحيله ام الخلاجين ولا دعاية الهواتف افلس برسلي الي هو داوود لووووووووعه ومصاخه ماصرت ولا دعاية حليبه ما دري يبيله لوووعه وحليمه بوله وعطرها هذا وييهي اذا مو ريحتها مهياوووه

    المهم الابدااعات معدومه وساعات الاعلانات مظلومه ورزق القطاووه على الخاملات

     
  • At 10/15/2006 9:27 PM, Blogger Unknown said…

    الدعايات من مستوى المسلسلات اللي تكون وسطها

    أنت تابع المسلسلات وأحلب لبن
    :p

     
  • At 10/18/2006 6:31 PM, Blogger loco said…

    walla ma enshoof el da3ayat , keel ma e6la3at da3aya qayarna el qanat ! ma adry eshfeehoom keel hatha 3alashan ebee3oon 5ala9 dareena !!!! el da3aya 5 , 10 dgayeeg ! mooo nee9 sa3a :S alla e5eeshom ma e5aloona neestanas eb ay mosalsal ! teeekrah el mosalsal minhoom

     
  • At 10/29/2006 12:18 PM, Blogger kuwaitia said…

    اي والله صح لسانج دعايات مليقه وتافهه فور يو ملييييييييقه قطيعه

     
  • At 10/29/2006 11:00 PM, Blogger الفراشة said…

    الدعايات برمضان ترفع الضغط

    وخاصه لما تكونين متابعه مسلسل

    اما اسخف دعاية فهي دعاية

    ام تي سي شوفني واشوفك

    الهبله والآهبل اللي يغنون

    وطلع بالاخير اللي بالتلفون بغبغاء


    ملاحظه
    على فكره مااعرف منو امل ام عصام!!

    ياليت تعلميني منو

     
  • At 11/01/2006 5:48 AM, Blogger شقول! شحجي؟ said…

    عزيزتى الفراشه
    امل ام عصام وحده ماعرفها :) تحط اعلان فى مجله الموعد اعلانها يقول انها امل ام عصام وانها تقرى الطالع وتعرف المستقبل ومن كثر ماكنا نشوف اعلانها قمنا نطلق على اى احد يقول عندى احساس بيصير شى ولا تقول انا كنت متوقعه هالشى وصار، نسميها امل ام عصام. اعلانها كان بكل عدد من اعداد الموعد من عشرين سنه واكثر وانا من زمان ماشريت الموعد. بس قلت عشان اشرحلج بروح اشتريها واحطلج صوره اعلانها. ولا ليه الحين اعلانها موجود بس شالت صورتها وصار اسمها ام عصام فقط . وتونى اكتشف انى ما اقدر اضيف لنك هنى .

     
  • At 11/02/2006 4:44 PM, Blogger إعلامية said…

    صج موضوع حلوو ياشقول
    لاتشكيلي ابكيلك !!

    فعلا الدعايات اوفر حده وإستخفاف مو طبيعي بعقل المشاهد
    ومثل ماقالت أم الحفيز على دعاية سمبا قرب ضم قرب شم وين قاعدين بالله ؟؟؟
    لا صراحة غثونا الله يغثهم ..!!

     

Post a Comment

<< Home